Бүгін Бішкекте Қырғызстанның төрағалығымен Шанхай ынтымақтастық ұйымына (ШЫҰ) мүше мемлекеттер басшылары кеңесінің кезекті отырысы басталады. Саммит аясында «ШЫҰ плюс» форматында жоғары деңгейдегі кездесу де өтеді.
Жиынға ұйымға мүше мемлекеттердің, шақырылған елдердің басшылары мен өкілдері, сондай-ақ БҰҰ-ны қоса алғанда, бірқатар халықаралық ұйымдардың жетекшілері қатысуда.
Кездесу барысында халықаралық және өңірлік күн тәртібіндегі мәселелер, ШЫҰ-ны одан әрі дамытудың басым бағыттары және саяси, сауда-экономикалық, көлік-логистикалық, цифрлық, экологиялық, мәдени және гуманитарлық салалардағы ынтымақтастықты кеңейту перспективалары талқыланады.
Саммит ШЫҰ-ның 25 жылдығына орайластырылып, Қырғызстанның ұйымға төрағалық ету кезеңін қорытындылайды.
Саммит қорытындысы бойынша бірқатар құжат қабылдау жоспарланып отыр. Олардың негізгісі ШЫҰ-ның 25 жылдығына арналған Бішкек декларациясы болмақ. Құжат ұйымның алдағы жылдардағы даму бағытын айқындауға тиіс.
Саммитті шамамен 250 жергілікті және 800 шетелдік бұқаралық ақпарат құралдарының өкілдері ақпараттық сүйемелдеуде.
Қазақстан Президенті Қасым-Жомарт Тоқаев бұған дейін ШЫҰ саммитіне қатысу үшін жұмыс сапарымен Бішкекке келген болатын. Мемлекет басшысы сондай-ақ VI Дүниежүзілік көшпенділер ойындарының ресми ашылу рәсіміне қатысты.
Саммит қарсаңында жаңа «Бішкек Арена» стадионында VI Дүниежүзілік көшпенділер ойындарының салтанатты ашылу рәсімі өтті. Оған шамамен 20 мемлекеттің президенттері және БҰҰ-ны қоса алғанда, халықаралық ұйымдардың басшылары қатысты.
Источник / Дереккөз / Source: Reuters
