- METRO AG компаниясы Қазақстандағы қызметін 2027 жылғы наурыздың соңына дейін тоқтату туралы шешім қабылдады.
- Шешім METRO-ның халықаралық портфелін тұрақты бағалау нәтижесінде қабылданды.
- Елеулі инвестициялар мен бизнестің нарықтағы орнын айқындауға бағытталған шараларға қарамастан, METRO Қазақстан тұрақты өсімге негіз болатын берік нарықтық позиция қалыптастыра алмады.
METRO AG компаниясы Қазақстан Республикасындағы қызметін 2027 жылғы наурыздың соңына дейін тоқтату туралы шешім қабылдады. Осыған байланысты METRO Қазақстанның барлық 6 дүкені мен жеткізу қызметі кезең—кезеңімен жабылады.
Бұл шешім соңғы бірнеше айда METRO-ның Қазақстандағы бизнесінің ұзақ мерзімді перспективаларын жан-жақты талдау нәтижесінде қабылданды. Жергілікті команда METRO Kazakhstan-ның клиенттерге арналған ұсыныстарын жақсартуға және көтерме сауда бизнес-моделін жергілікті нарықтың ерекшеліктеріне бейімдеуге елеулі күш салды. Соған қарамастан, компания тұрақты өсімге берік негіз қалыптастыруда қиындықтарға тап болуын жалғастырды.
«Қазір METRO Қазақстанның барлық қызметкерлері үшін өте күрделі кезең басталды», – деді METRO Қазақстанның бас директоры Месут Догукан. «Біз әріптестеріміздің соңғы он жеті жылда қол жеткізген жетістіктерін мақтан тұтамыз. Барлық қызметкерлерімізге көпжылдық еңбегі мен компанияға деген адалдығы үшін, сондай-ақ іскерлік серіктестеріміз бен мемлекеттік органдарға METRO-ның Қазақстандағы бүкіл қызметі барысында көрсеткен сенімі, ынтымақтастығы және қолдауы үшін алғыс айтқым келеді. Бүгінгі басты басымдығымыз – METRO Kazakhstan-ға сенім артқан 650 қызметкеріміздің, сондай-ақ клиенттеріміз бен жеткізушілеріміздің мүдделерін ескере отырып, бұл үдерісті жауапкершілікпен әрі тиісті құрметпен жүзеге асыру».
METRO Қазақстан нарығына 2009 жылғы қазанда шығып, көтерме сауда саласындағы алғашқы халықаралық компания болды. Бұл еуропалық инвестициялар тарту және елдің сауда инфрақұрылымын жаңғырту жолындағы маңызды кезеңдердің бірі болды.
Содан бері METRO дүкендер желісін, логистиканы, жеткізу тізбектерін, қызметкерлерді және іскерлік серіктестіктерді дамытуға елеулі инвестиция салды. Соңғы жылдары METRO Kazakhstan қонақжайлылық және сауда саласындағы кәсіпорындар үшін серіктес ретіндегі орнын нығайтты. Осы бағытта компания көтерме сауда мүмкіндіктерін кеңейту үшін жеткізу қызметін дамытты. Алайда қабылданған шараларға қарамастан, клиенттері ел аумағына кеңінен таралған мамандандырылған азық-түлік көтерме сауда нарығында METRO Kazakhstan үшін тұрақты өсімге қажетті перспективаларды қалыптастыру қиын болып қала берді.
METRO Kazakhstan бүкіл өтпелі кезеңде қызметкерлеріне барынша қолдау көрсетіп, оларға әділ әрі құрметпен қарайды және еңбек заңнамасының барлық қолданыстағы талаптарын толық сақтайды. Сонымен қатар жергілікті басқарушы команда алдағы айларда клиенттермен, іскерлік серіктестермен және басқа да мүдделі тараптармен өзара іс-қимыл жасай отырып, барлық қажетті қадамдардың жауапкершілікпен жүзеге асырылуын қамтамасыз етеді.
METRO – қонақүй және мейрамхана бизнесі кәсіпорындарына, кейтеринг компанияларына (HoReCa), сондай-ақ тәуелсіз бөлшек сауда кәсіпорындарына (Traders) қызмет көрсетуге маманданған азық-түлік өнімдерінің жетекші халықаралық көтерме жеткізушісі. METRO бүкіл әлем бойынша шамамен 15 миллион клиентке қызмет көрсетеді және оларға бірегей көпарналы көтерме сауда моделін ұсынады: клиенттер тауарларды өз өңіріндегі компанияның ірі дүкендерінің бірінен сатып ала алады немесе Food Service Distribution (FSD) бағыты арқылы жеткізуге тапсырыс бере алады. Барлық сату арналары өзара біріктірілген және цифрлық шешімдермен қолдау көрсетіледі. Сонымен қатар METRO MARKETS еншілес компаниясы кәсіби клиенттердің қажеттіліктеріне арналған халықаралық онлайн-платформаны дамытып келеді. 2019 жылы іске қосылғаннан бері платформа жүйелі түрде кеңейіп, дамып келеді. Тұрақты даму – METRO қызметінің негізгі қағидаттарының бірі. Компания тұрақты даму саласындағы түрлі халықаралық индекстер мен рейтингтерде, соның ішінде MSCI, Sustainalytics және CDP-де ұсынылған. METRO әлемнің 30-дан астам елінде қызмет етеді және 84 000-нан астам қызметкерді біріктіреді. 2024/25 қаржы жылында компанияның сату көлемі 32,4 млрд еуроны құрады.
Фото / Photo: Metro
Источник / Дереккөз / Source: Metro
